ရာစုနှစ်တွေပြောင်းလာတာနှင့်အမျှ နှစ်ဆွေးလာတဲ့အရာတွေက အဖိုးတန်လာလေပဲမဟုတ်လား။ ကလောမြို့လို မြန်မာနိုင်ငံရဲ့ထိပ်တန်းခရီးသွားနေရာမှာလဲ ဒီလိုနှစ်ဆွေးနေတဲ့ အဖိုးတန်အရာတစ်ခုရှိတယ်ဆိုတာ ခရီးသွားတွေအတွက်လေ့လာစရာနေရာအပြင် ဒေသခံတွေအတွက်လဲဂုဏ်ယူစရာပါပဲ။
ရှမ်းပြည်နယ်ရဲ့တောင်ပိုင်းမှာရှိနေတဲ့ ကလောမြို့လေးဟာ ခရီးသွားရာသီတင်မကပဲ အချိန်တိုင်းကို ခရီးသွားတဲ့သူတွေအပြည့်ရှိနေတဲ့ အေးချမ်းတဲ့တောင်ပေါ်မြို့လေးပါ။ လည်ပတ်စရာနေရာလည်းပေါများပြီး နိုင်ငံခြားသားခရီးသွားတွေပါမျက်စိကျရတဲ့နေရာလဲဖြစ်ပါတယ်။ ကလောမြို့ရဲ့လည်ပတ်စရာတွေထဲ Church တွေကလဲအပါအဝင်ဖြစ်ပါတယ်။ Kayin Baptist Church, Saint Catherine Anglican Church နှင့် Christ The King Church တို့ဟာကလောမြို့ရဲ့အထင်ကရ Church ကျောင်းများဖြစ်ကြပြီး လူတွေအသိများတဲ့ နှစ်(၁၀၀) Church ကျောင်းဆိုသည်မှာ Christ The King Church ဖြစ်ပါတယ်။
ADVERTISETMENT
နှစ်(၁၀၀) Church ကျောင်းလို့ လူသိများပေမယ့် တကယ်တော့ Church ကျောင်းကြီးဟာ နှစ်(၁၀၀)မပြည့်သေးပါဘူး။ ၁၉၃၀ ခုနှစ်ဝန်းကျင်ကအီတလီသာသနာပြုဘုန်းတော်ကြီးအဖ ဘိုလ်ဒရီနီကဆောက်လုပ်တည်ထောင်ထားခြင်းဖြစ်ပါတယ်။ ဒုတိယဖာသာကတော့ အိန္ဒိယနွယ်ဖွား ဖာသာ အန်ဂျီလို ဒီမီရို ဖာသာ ပေါလ်ဖြစ်ပါတယ်။ တတိယဖာသာကတော့ အိန္ဒယလူမျိုး ဖာသာ ပေါလ်ဖြစ်ပါတယ်။ ဖာသာ(၃)ဆက်တိုင်ပြီဖြစ်ပါတယ်။
အင်္ဂလိပ်တွေတည်ခဲ့တဲ့ကလောမှာ နှစ်အကြာကြီးရှိတဲ့ Church ကျောင်းမို့ ဗိသုကာလက်ရာတွေကလဲ ကိုလိုနီခေတ်လက်ရာတွေဖြစ်နေပါတယ်။ ကိုလိုနီခေတ်က တည်ဆောက်ပုံတွေနဲ့ Church ကျောင်းကြီးဟာ အပြင်ဘက်မှ ခန့်ညားနေပြီး အတွင်းဘက်ကလည်း ကြီးကျယ်ခမ်းနားနေပါတယ်။ Church ကျောင်းကြီးရဲ့မျက်နှာချင်းဆိုင်မှာ အ.ထ.က ၂ ကလောကျောင်းရှိပြီး အပေါ်နားမှာတော့ Pine Hill Resort ရှိပါတယ်။ ကျောင်းကြီးဘေးမှာ ထင်းရှူးတောကြီးရှိနေပြီး တိတ်ဆိတ်ငြိမ်သက်နေပါတယ်။ အရင်ကတော့ ခရီးသွားတွေကို Church ကျောင်းထဲကို ဝင်ရောက်လည်ပတ်ခွင့်ပြုပြီး နောက်ပိုင်းမှာတော့ ဘုရားရှစ်ခိုးဝတ်ပြုမည့်သူများကိုသာ ဝင်ခွင့်ပေးပါတော့သည်။
ကျောင်းကနေ ဆက်သွားမယ်ဆို ကလောနာရီစင်၊ ကလောစျေး တို့ကို နီးနီးနားနားသွားရောက်လည်ပတ်နိုင်ပါသေးတယ်။ ကလောရောက်ဖြစ်ခဲ့ရင် Christ The King Church ကို ဝင်ရောက်လေ့လာကြည့်ကြပါ။
ADVERTISETMENT
